O alcalde, Carlos Armesto, supervisou o desenvolvemento das dúas primeiras actuacións que contempla este plan municipal: a estrada que une A Reguenga coa Senra, na parroquia de Mourelos, e que comunica distintos núcleos do municipio; e os accesos a Vilar, na parroquia de Marrube.

As obras estenderanse a outras parroquias do municipio contribuíndo á mellora das vías de comunicación de titularidade municipal e, polo tanto, tamén á mellora da seguridade viaria en beneficio dos veciños e usuarios.

Armesto explica que “o resultado das actuacións é bo” e lembra que estas intervencións se engaden a outras obras postas en marcha recentemente polo goberno local co obxectivo de “dotar de máis e mellores servizos aos nosos veciños”. É o caso da traída de auga da parroquia de Diomondi que se prevé rematar no verán ou a mellora do parque infantil da rúa Xan de Forcados, en Escairón.