O Grupo Parlamentario do BNG recibiu ao profesorado do centro monfortino de cara a promover iniciativas e accións que conduzan á solución do conflito actual e ao asentamento do Conservatorio como Servizo público e pedagóxico necesario para toda a Comarca de Lemos.
“Esta problemática xa ultrapasou os límites municipais toda vez que os usuarios proceden de toda a comarca, e as competencias en Educación son de ámbito autonómico, alén das políticas de discriminación salarial e de xénero que se están a practicar neste centro” dixo textualmente a Deputada Lucense Carme Aira.
Os nacionalistas veñen tamén de rexistrar unha Iniciativa Urxente no Parlamento Galego coa que pretende poñer enriba da mesa algo tan grave como a diferenza salarial que se está a dar entre mulleres e homes neste centro de ensino. “A intención das nacionalistas é implicar ao goberno da Xunta na solución, porque isto é inadmisible en pleno século XXI” explica Carme Aira.
