A conexión do Porto Seco coa estrada N-120, consta de 2 de fases, das que a primeira, do Porto Seco ás Fontes xa está rematada, mentres que a segunda, das Fontes á N-120, está proxectada, pero a día de hoxe non se puido concluír por mor das diferencias existentes entre a Xunta de Galiza e o Goberno do Estado.
Esta conexión é un vial indispensable para o funcionamento do Porto Seco, ademais de servir como circulación Leste de Monforte. Aa entender do BNG, o enquistamento desta situación é “sinal do pouco que lle importamos ás administracións implicadas que, coa súa desidia, están castigando inxustificadamente á veciñanza monfortina.”
No pleno municipal deste luns, 31 de maio, o representante nacionalista solicitará que o alcalde de Monforte promova unha xuntanza onde participen o subdelegado do Goberno en Lugo, o delegado da Xunta de Galiza en Lugo e os portavoces Municipais, a fin de aclarar a situación na que se atopa o expediente deste vial e esixir o desbloqueo da situación.
