Un grupo de técnicos do Centro de Investigación Forestal (CIF) de Lourizán desprazáronse este venres a Folgoso do Courel para avaliar os danos causados polo incendio rexistrado esta semana na zona e que afectou a unhas 185 hectáreas.

En concreto, tras a análise realizada, os técnicos puideron comprobar que o chan non sufriu un nivel de afección importante, polo que non parece haber risco de erosión nin de escorrentía, a pesar da pendente existente na zona.

Así, as necesidades pasarían, segundo as primeiras análises, por rexenerar a vexetación a longo prazo, especialmente nas valgadas.

O lume quedou extinguido o pasado luns na parroquia homónima, tras comezar na madrugada do sábado, afectando 145 hectáreas de raso e 40 arboredos.