A Asociación Semente Monforte lembra que o 30 de xuño rematará o prazo de presentación de ideas para o VII Concurso de Proxectos Empresariais Semente Ribeira Sacra, un certame con inscrición de balde que premia aos tres mellores proxectos de emprendemento recibidos.
O obxectivo do certame foi sempre incentivar e impulsar proxectos empresariais, obxectivo que se mantén con máis interese ca nunca nestes tempos de pandemia. Tanto é así que este ano a organización decidiu incrementar a contía dos premios, que se establece así: 1º Premio, importe de 12.000 euros, 2º Premio, 8.000 e 3º Premio 5.000 euros.
ANTECEDENTES
Cando no 2014 a Lotaría do Neno caeu en Monforte, un grupo de voluntarios e agraciados co premio crearon o Concurso de Proxectos Empresariais Semente Monforte. Desde aquela incorporáronse á iniciativa administracións, institucións e empresas que apoian o impulso de proxectos empresariais e que, agora co nome de Semente Ribeira Sacra, afrontan a VII edición deste concurso. A iniciativa leva entregado máis de 100.000 euros para axudar a materializar ideas innovadoras.
