O ciclo Narra Sarria chega ao seu fin este domingo 1 de agosto. Nesta derradeira xornada Nerea Brey contará para os máis pequenos ás 12.30 horas no Malecón. “Lúa e o tesouro do hórreo” é o título do seu espectáculo narrativo que recolle as lendas galegas da man dunha rapaza moi bulideira que está na busca dun tesouro.
Pechará o festival Iván Davila cos seus “Contos na lareira“, unha proposta para cativos de máis de 3 anos. Será na Praza da Vila ás 20.00 h.
E este mesmo día, outra interesante alternativa, un concerto de Xoán Curiel baixo o título de “Treides comigo!” e coa participación de Iris Gey e outros músicos. Terá lugar na Praza de Juan María López (Igrexa de Santa Mariña) ás 21:00 h. e o acceso será libre por orde de chegada ata completar aforo.
Nesta actuación asistiremos a unha revisión actualizada das cantigas da lírica medieval galego portuguesa, nunha sorte de “pop fusión medieval” no que Xoán e Iris, acompañarannos nunha viaxe con ritmos e cores doutra época e as historias que lles dan forma. Xunto a Xoán Curiel (guitarras e voz) e Iris Gey (voz) estarán tamén Carlos Freire (percusión), Bleuenn Lle Friec (arpa) e Álex Salgueiro (frautas).
