O concello da Pobra do Brollón pon en marcha unha nova inciativa para potenciar e dinamizar os recursos turísticos do concello. Tátase da posta en marcha dun albergue para peregrinos co obxectivo de crear servizos no concello como etapa dentro do Camiño de Inverno.
O equipo de goberno quere posicionar a Pobra do Brollón como final de etapa do Camiño e que os peregrinos poidan quedar a durmir no concello, abrindo a posibilidade de cear e almorzar. Desde o concello tomouse esta decisión, segundo informan en nota de prensa, para poder dar servizos aos peregrinos unha vez que na capitalidade municipal non queda ningún hostal. Segundo apunta o alcalde da Pobra do Brollón, Xosé Lois Maceda, no momento que se abra alguna empresa privada que preste este servizo, o concello deixa de ofrecelo, “facémolo agora puntualmente para cubrir este baleiro”.
Este albergue provisional solidario púxose en marcha en canto se contou co documento de cambio de uso da instalación e desde que abriu xa recibiu peregrinos. A sala na que se da o servizo de albergue conta con 6 literas, 12 prazas, ofrece servizo de duchas, roupa de cama e sacos de durmir. Para poder durmir no albergue da Pobra do Brollón é necesario chamar ao 666 43 58 32.
