Para o desenvolvemento de INTERRITMOS primeiro tivo lugar un concurso de maquetas en liña. De entre todos/as os/as participantes, un xurado profesional seleccionou seis finalistas que participaron nun encontro musical, o 25 de setembro no Náutico de San Vicente do Mar, no Grove. Neste encontro musical, a través dunha actuación en directo, foron seleccionados dous grupos/artistas gañadores, que realizaron un circuíto musical ao vivo nos territorios implicados.
No territorio do GDR Ribeira Sacra-Courel leváronse a cabo dúas xornadas, a primeira o 8 de outubro na Aldea de Trascastro (O Incio), e a segunda que se celebrou o día 9 de outubro en Vilachá de Salvadur (A Pobra Do Brollón). Todas as actuacións estiveron acompañadas da celebración de coloquios e charlas sobre distintos aspectos da evolución da industria cultural e da música tradicional.
Agora Interritmos Sons Do Rural pon punto e final no territorio do GDR Ribeira Sacra-Courel cunha xornada que leva por título “Encaixes e co-protagonismo da música tradicional / de raíz nos espazos da festa” que contará con Susana Seivane como relatora. A xornada terá lugar o venres 29 de outubro, a partir das 18.30h, na Praza da Filgueira, detrás da casa do concello de Bóveda. A xornada completarase coas actuacións do Grupo de Gaitas O Recanto de Quiroga e a Banda de Folk de Ribas de Sil 3.0 para finalizar cun magosto. O aforo é limitado sendo necesaria previa inscrición no seguinte email: info@ribeirasacracourel.es
