A situación xeral da covid19 nestas últimas semanas, con tendencia ascendente no número de contaxios, impedirá que a ‘Festa da Pisa’ poida celebrarse o vindeiro domingo 5 de decembro en Froxán.

A Asociación Fonte do Milagro comunicaba na mañá de hoxe a decisión de suspender a celebración deste ano, tanto da Festa da Pisa como da demostración de Aserrado, por prudencia e diante da situación pandémica actual.

Este medio falou tamén coa alcaldesa de Folgoso do Courel, Dolores Castro, quen nos dixo ser coñecedora da decisión e estar totalmente dacordo con ela. “É o máis prudente nestes momentos”, comentou.

Dende a Asociación Fonte do Milagro comentan tamén que se procederá á devolución dos cartos daquelas persoas que tiveran feito xa a reserva do ‘Menú do Pisador’.