A Asociación Veciñal do Saviñao pide a dotación dun Punto Limpo oficial e homologado de depósito de todo tipo de materiais de escombros non orgánicos. “Coa apertura tan só os sábados pola mañá é a todas luces escaso e ineficaz. Dito punto limpo debería estar aberto dunha maneira continuada para a súa eficacia e servizo, ben coa presenza dun operario ou cunha previa chamada a un responsable do Concello,” puntualizan desde a asociación.
Aseguran que nos últimos dous meses na zona entre o vello campo da Lama e o novo campo de futbol, estase creando unha escombreira, composta de material de obra, mobiliario vello, rodas e outros restos. “Como queira que o territorio é de titularidade municipal, consideramos que este novo e amplo punto de verquidos conta co permiso do Concello. Recentemente viuse como se retirou gran parte do material, pero volve a medrar día a día”, sinalam desde a asociación.
Preguntan á Corporación municipal se esta escombreira vai ser permitida e se entrarán na dinámica de continuar acumulando materiais e periodicamente proceder á súa retirada. Solicitan da Corporación Municipal un debate sobre esta carencia e solución a unha problemática que está ocasionando múltiples pequenos verquidos de escombro no municipio.
