Dúas persoas resultaron feridas de diversa consideración tras ser atropeladas na noite deste pasado martes no termo municipal de Chantada por un vehículo que continuou a marcha.

Segundo informaron o 112 Galicia, dúas persoas resultaron feridas, unha delas de consideración, despois de ser atropeladas por un turismo que circulaba pola antiga estrada de Ourense, á altura do campo de fútbol de Chantada.

Foi un particular quen, sobre as 22,30 horas do martes, chamou ao servizo de emerxencias para pedir axuda e indicou que acababan de atropelar ao seu marido e o coche continuou a marcha.

Con estes datos, os xestores do 112 puxeron os feitos en coñecemento do persoal de Urxencias Sanitarias de Galicia-061 e da Policía Local. Do mesmo xeito, foron informados os Bombeiros de Chantada e os efectivos de Protección Civil da localidade.

Fontes sanitarias concretaron que ao lugar desprazouse unha ambulancia de soporte vital básico e persoal sanitario da PAC de Chantada, así como unha ambulancia de soporte vital avanzado que evacuou ao home J.R.G.B., de 61 anos, ao Hospital de Monforte.