En Monforte os Reis Magos chegaron á estación de tren onde foron recibidos polo Alcalde, membros da Corporación municipal e pola música da Escola de Gaitas do Concello.
Alí, a Comitiva Real integrada por catro carrozas cos Reis Magos e seus paxes, formados por alumnos de sexto de primaria dos centros de ensino da cidade, o Grupo de Gaitas do Concello e outros grupos musicais e decorativos, iniciaría a cabalgata para finalizar no Campo de San Antonio co discurso das súas maxestades.
No concello de Sober os Reis Magos fixeron cinco paradas desde ben cedo; en Cadeiras, Bulso, Canaval, Anllo e na Casa da Cultura da localidade onde os esperaban os nenos e nenas das aldeas próximas a eses lugares. Deste xeito evitáronse aglomeracións na capitalidade e deuse cumprimento en todo o momento ao protocolo sanitario en vigor. Todos os nenos e nenas levaron o seu agasallo nun día moi especial para eles.
Os Reis Magos de Oriente visitaron tamén o concello de Bóveda onde fixeron entrega de agasallos a todos os nenos e nenas que previamente se anotaran. Cumpriuse con todas as normas sanitarias en vigor. O Concello agradece a visita dos Reis e a participación de todos os nenos e nenas.
No concello de Pantón a tarde do mércores aproveitouse para desenvolver xogos infantís na Praza do Concello e despois as súas maxestades de Oriente recibían aos máis cativos para coñecer que desexos tiñan.
