Martes de Entroido en Monforte de Lemos, día grande do carnaval na capital da Ribeira Sacra e un desfile moi esperado tras a suspensión do pasado 2021.
Non por esperado suscitou máis inscricións que anos anteriores, sendo con 16 comparsas e unhas 718 persoas apuntadas un dos anos máis baixos en participación. No 2019 e 2020 as inscricións superaron as mil persoas. A incerteza meses antes de se habería ou non desfile, a falta aínda de seguridade e confianza por mor do Covid e a escasa participación de comparsas de fóra de Monforte foron quizais os motivos principais desta baixa participación.
En calquera caso, os disfraces e as comparsas desfilaron por Monforte, e nin a choiva puido impedilo. Completouse o percorrido e fíxose a entrega de premios dende o palco da orquestra que había na Compañía, se ben, a festa quedou xa deslucida e a xente empezou a ‘desfilar’ para as súas casas ante a tarde de auga que non daba tregua.
A comparsa triunfadora deste martes de entroido foi a bautizada como “Chegada da Raíña Isabel de Inglaterra a Monforte”. Tres foron os premios que levaron os Xograres de Lemos, asociación protagonista da mesma: Premio á posta en escea, premio música en vivo e premio á comparsa de entre 51 e 90 compoñentes.
VARIOS DOBRETES
“Non hai fronteiras no espazo”, de Cobas, levou o 1º premio de carrozas e outro 1º nas comparsas de 4 a 24 compoñentes; outro FOI para a carroza-comparsa “Warner Bros Presenta”, de Berta López Díaz, que levou o primeiro premio de comparsas de entre 25 e 50 compoñentes, e un áccesit no premio de carrozas; o de “El Iglú de Piñeira”, da Familia Pérez Varela-Piñeira, cun 3º premio na categoría de comparsas entre 4 e 24 compoñentes e un áccesit no premio ás carrozas; destacado tamén o acadado pola Asociación Prodeme, que levou o 3º na categoría de comparsas entre 51 e 90 compoñentes e o 2º por carrozas co seu “Hasta el infinito y más allá”; o de “Sonrisas de esperanza” do Colexio Ferroviairo cun 2º premio por comparsa de entre 51 e 90 compoñentes, e un 3º na categoría de carrozas; “As patacas da Gándara” –ANPA A Gándara– levaron un áccesit por carrozas e o 2º premio na categoría de comparsas de entre 25 e 50 compoñentes; e “Os meniños de Carude”, co ‘premio ao mellor humor’ e o 3º como comparsa de entre 25 e 50 compoñentes.
O premio gordo, dotado de 1.100 € e para comparsas de máis de 90 compoñentes foi nesta ocasión para a ANPA A Lagoa do Colexio Novo. A súa creación gañadora foi “Os playmóbil van ao Colexio Novo”.
COMPARSAS DE FÓRA DE MONFORTE
No apartado de premios ás comparsas de fóra, na comparsa de 1 a 3 compoñentes, o premio foi para Sistín do Mato, en Sober, coa súa representación “Doctor Covid y su vacuna”; e na categoría de comparsa de 4 a 24 compoñentes, a titulada “As Rouxiqueiras” obtivo o premio que vai para Sanxenxo.
A relación completa de participantes e premios acadados está na web do concello.
