A Asociación de Veciños/as de Vilachá de Salvadur no concello da Pobra do Brollón asegura que hai máis dun mes que deu aviso da caída dun poste da telefónica. O poste situado no acceso ao castro do Castrelao impide o paso dos vehículos. O Concello da Pobra do Brollón deu parte á compañía responsable o mesmo día en que a veciñanza deu aviso, pero máis dun mes despois a situación segue igual, “un poste partido pola metade, un cableado practicametne a ras de solo e un camiño cortado. Ademais disto tamén existe o perigo de que parta o poste do outro lado,” sinalan desde a asociación.
Insisten desde a asociación en que este tipo de avarías que suceden no rural tardan sempre moito tempo en ser arranxadas. As empresas non teñen interese en resolver o problema cando se trata de núcleos rurais. E lembran que non hai moito sucedeu exactamente o mesmo na veciña parroquia de Liñares (A Pobra do Brollón), “un poste impedía o tránsito de vehículos, incluídos os de emerxencias ou outros como a recollida do lixo. Así estiveron tamén máis dun mes.”
“Unha zona coma a Ribeira Sacra que está xerando tanta expectativa a todos os niveis e o pulo turístico que está vivindo non pode permitirse o abandono que vive o rural. Porque son precisamente os habitantes destas zonas os que manteñen vivo e coidado o territorio,” conclúen.
