Fidel Vázquez, director xeral do SEPES –Entidad Pública Estatal del Suelo–, acompañou este luns 14 de marzo a Beatriz Sestayo, xerente de SEA –Suelo Empresarial del Atlántico– para coñecer o estado da demanda de solo industrial en Monforte.
Nesta visita reuníronse co alcalde José Tomé Roca para avaliar a situación actual do polígono industrial do Reboredo, un dos 13 que xestiona SEA en Galicia, e coñecer a demanda empresarial que hai na zona.
Beatriz Sestayo evidenciou a boa marcha do mesmo co feito de que só quedan dispoñibles tres parcelas. Lembrou que o pasado 2021 adxudicáronse un total de 51.073 metros cadrados de solo industrial, oito parcelas por 1,2 millóns de euros, e neste 2022 a ‘empresa locomotora’ do Reboredo, Oviganic, reservou unha nova parcela de 3.000 metros cadrados. Todo o anterior, dixo, “repercutirá a curto e medio prazo nunha importante xeración de emprego, no marco dos obxectivos de recuperación do Goberno de España”.
Pola súa banda, o director xeral do SEPES, Fidel Vázquez, valoraba tamén moi positivamente esta que foi para el “unha primeira toma de contacto” coñecendo os datos e visitando, en compañía de Beatriz Sestayo e o rexedor monfortino, o polígono industrial.
