A xuntanza, impulsada polo profesor Eduardo Rey e organizada pola Biblioteca Fiz Vergara Vilariño do IES Gregorio Fernández de Sarria, será ás 12:00 h. e conta tamén coa colaboración do Concello de Sarria.

O evento, enmarcado no Día da poesía e dedicado a Fiz Vergara Vilariño, celebrarase por primeira vez, tras suspenderse no 2020 por mor da pandemia, coa intención de reunir a todo o alumnado dos centros educativos de Sarria para recitar poemas del. Xurxo Souto, profesor de latín no IES Gregorio Fernández, será o condutor do acto que, segundo palabras del, representa unha auténtica “conmoción pangalaica poética”.

POESÍA POR UN TUBO

Máis de 400 rapazas e rapaces de todos os colexios e institutos participarán nesta gran “performance poética” bautizada como “poesía por un tubo”.

O propio Xurxo Souto, resumindo o que acontecerá este luns na Praza da Vila de Sarria, explícanos que “cun tubo de cartón, que cada un fixo para a ocasión lanzarán polos camiños do vento os versos de Fiz Vergara Vilariño;  neste tempo de desacougo, de tristura e violencia, un manifesto de vida, de palabra e de futuro… conmoción pangalaica poética en Sarria”.