Os dous pasos inferiores do ferrocarril na parroquia de Piñeira, situados na estrada LU-P-321 e no enlace da N120a, respectivamente, na actualidade están dotados dunha soa beirarrúa, protexida por unha varanda metálica. Segundo o BNG estas beirarrúas incumpren a lexislación vixente no relativo ás barreiras arquitectónicas; é dicir, o espazo entre o muro de formigón e as varandas, nalgún caso, non chega aos 50 cm.
Aseguran que nas últimas datas son moitos os usuarios que lles teñen manifestado os inconvenientes que isto ocasiona, nomeadamente, persoas maiores, carriños de nenos, etc. Lembran desde o BNG que é obriga das institucións públicas, a eliminación das barreiras arquitectónicas en aras da igualdade de toda a veciñanza.
Así o BNG demanda que o goberno municipal se dirixa ao ADIF, para que corrixa as deficiencias sinaladas e que se envíe copia da correspondente reclamación aos grupos municipais.
