A Asociación veciñal do Saviñao considera que o turismo cultural é respectuoso co medio ambiente, non é masivo nin agresivo co entorno e coa paisaxe. “Debe ser o modelo a conseguir no territorio Ribeira Sacra, dadas as peculiaridades da nosa fráxil orografía que lle confiren o atractivo que está comezando a facerse notar. Nestes últimos anos estamos vendo como todos os concellos do sur de Lugo están facendo esforzos por dar a coñecer os seus patrimonios culturais, científicos ou paisaxísticos para atraer ese cobizable turismo cultural ao territorio propio”, aseguran desde a asociación.
Poñen de exemplo Quiroga, co percorrido e o museo xeolóxico, Pantón coas xornadas do Románico ou en Sober cos seus miradoiros e petróglifos. Ee lembran que no Saviñao contan cun tesouro por descubrir, que é o Neolítico. “Temos 56 mámoas catalogadas, que deberían ser estudiadas para poder escavar algunhas e crear un itinerario neolítico, pero ese é un tema para reflexionar con tranquilidade. Dese conxunto megalítico temos ao descuberto dous dolmens: o de Abuíme, obxecto de numerosas visitas, e o da Leira Rapada, que posúe o interese engadido dos grabados petroglíficos na súa tapa.”
A solicitude veciñal pretende que se dea a coñecer e se destaque o valor deste monumento megalítico para reforzar a oferta de turismo cultural do municipio. E agardan que o concello asuma estas intervencións para poñer de relevo a importancia deste exclusivo patrimonio arqueolóxico.
