O voceiro do xurado destacou de Extraordinario, a riqueza léxica e os valores  estilísticos relacionados coa sintaxe, que se visualizan a miúdo a través dunha puntuación orixinal. Babarro engadiu que “o uso da primeira persoa, a distribución do texto en noventa notas de desigual extensión e o ritmo narrativo conseguido facilitan a lectura e acaban atrapando o lector”.

O xurado do XII Premio Narrativa Breve Repsol define a Extraordinario como unha novela sólida, atractiva e ben narrada, cunha riqueza temática que se complementa con recursos de tipo irónico e humorístico.

O autor premiado, Antón Lopo, naceu no 61 en Monforte de Lemos, escritor, xornalista e editor, foi durante máis de vinte anos coordinador da Revista das Letras. Algúns dos títulos do escritor son As reliquias(1991), coa que gañou o Premio Café De catro a catro; O riso de Isobel Hill(2000); Ganga(2001); e Obediencia(2010), coa que obtivo o Premio Manuel García Barros. Como poeta é autor de Sucios e desexados(1987), Manual de masoquistas (1990), A sombra dos rapaces mexando(1995), O libro dos amados (1996), OM (1996) e Pronomes(1998).

No 2016 Antón Lopo funda canda outros cinco autores a librería compostelá Chan da Pólvora e a editorial homónima.