A comisión de festas de Paradela suspendeu as festas de San Miguel, que se ían a celebrar desde o xoves no municipio de Paradela, pola morte de Roberto Rubio, o motorista atropelado en Lugo, xa que era natural desta localidade. O alcalde, José Manuel Mato, deu tamén a súa aprobación a esta suspensión.

Roberto Rubio faleceu na noite do luns ao ser atropelado polo condutor dun vehículo que triplicou a taxa de alcoholemia. O detido pasou a disposición xudicial tras a súa detención e foi posto en liberdade con medidas cautelares e mantense como investigado por homicidio imprudente.

José Manuel Mato manifestou que no pobo reina “unha dor profunda”, polo que “se suspenderon as festas de San Miguel, que son as segundas festas da capitalidade” do concello de Paradela.

“O pobo está a pasalo moi mal. Roberto (Rubio) naceu aquí, criouse aquí, despois foi a Lugo (onde rexentaba unha barbaría), aínda que seguiu moi vinculado a Paradela. Foi gaiteiro nunha asociación cultural, unha persoa moi activa na vida cultural, deportiva e social do concello“, describiu.

O alcalde destacou que “era unha belísima persoa, moi querido e tanto de moza como agora (contaba con 50 anos) estaba moi comprometido”. “Era unha persoa que tiña moi bo humor, moi bo carácter. Non temos recordos da infancia de que tivese ningún tipo de problemas”, subliñou.

José Manuel Mato insistiu en que é unha “desgraza” e que esta “ausencia” se vai notar no concello. “Estamos a recibir moitas condolencias”, agregou.

Así as cousas, Paradela suspendeu as festas, aínda que se mantén a misa por San Miguel pero sen fogos artificiais nin procesión.