Diante do comunicado elaborado e publicado conxuntamente polo sindicato CGT e polo denominado grupo SAF Chantada, outras traballadoras do SAF aseguran non sentirse representadas.

Informan de que o día 6 de outubro de 2022, dous días despois da convocatoria da CGT, celebrouse unha asemblea de traballadoras convocada pola CIG, “na que se manifestou o apoio á liña sindical que maioritariamente se tiña defendido en anteriores asembleas e que nunca foi imposta nin polo sindicato nin pola delegada, senón que é decidida colectivamente despois de debaterse e acordase nestas asembleas”.

Aseguran que na cita coa CIG as traballadoras amosaron o interese en centrar os esforzos na reivindicación de demandar á empresa o cumprimento íntegro das sentenzas xudiciais “do Conflito Colectivo promovido pola CIG, para que se continúe aplicando o Convenio Colectivo do Concello de Chantada e que nestes momentos está recorrido pola empresa, ao ser favorable para as traballadoras en cuestións como xornada semanal de 37,5 horas, pago quilometraxe, tempos de desprazamento como tempo de traballo tanto ao primeiro como ao último domicilio, permisos acompañamento familiares, 9 días de asuntos propios, trienios ao 3% do salario.”

Este colectivo de traballadoras conclúe, “non buscamos crear divisións, si defender os nosos intereses sen dúbidas contra quen temos que dirixir as nosas reivindicacións, que non son outros que a empresa Samain que neste caso é a responsable directa dos incumprimentos en materia laboral e o Concello de Chantada como responsable do Servizo.”