No acto de clausura do Coworking-Ribeira Sacra de Monforte participaron a Subdirectora da Oficina Galicia Emprende, Fany Suárez, o Director da Área de Desenvolvemento de Pemes da Escola de Organización Industrial, Javier Benito e a Tenente de Alcalde, Gloria Prada
Tras as intervencións, déronse a coñecer os 16 os proxectos protagonistas desta sexta edición do Coworking Ribeira Sacra e que se materializaron en empresas que xa están comezando a dar os seus primeiros pasos.
Na súa intervención, a tenente de Alcalde monfortina, salientou que “é un orgullo e unha satisfacción tanto para o Alcalde coma para o Equipo de Goberno comprobar que na nosa cidade segue habendo ideas emprendedoras, e desexamos que tralo voso paso polo Coworking poidades levar adiante o voso proxecto de empresa. Tódalas edicións levadas a cabo ata agora do Coworking-Ribeira Sacra de Monforte foron un éxito, por iso confiamos en que esta no sexa a última edición e que sigan vindo outras“.
Do mesmo xeito, Gloria Prada salientou “Atopámonos no interior de Galicia, onde é moi necesario crear postos de traballo e asentar poboación e así ter un crecemento económico. Deste xeito, as iniciativas empresariais que se dean no noso territorio son moi importantes. Por iso, o éxito das vosas iniciativas e de vós como emprendedores é un éxito para esta comarca de Lemos.” A Tenente de Alcalde rematou animando aos participantes a non perder o ánimo e a seguir loitando polas súas ideas e pola súa empresa ou negocio.
