A subdelegada do Goberno, Isabel Rodríguez, sinalou que ditas actuacións enmárcanse no conxunto de melloras planificadas polo Goberno para o corredor ferroviario Ourense – Monforte – Lugo cun investimento total de 546 millóns de euros para mellorar a fiabilidade, o confort e os tempos de viaxe, así como para adaptala aos parámetros de altas prestacións. Cos sistemas de protección da infraestrutura, ademais, disuádese e evítanse tránsitos indebidos polas vías.

“Unha vez máis os feitos demostran que este Goberno mantén a Lugo na súa axenda e cumpre os seus compromisos coa provincia”, destacou a subdelegada que explicou que as obras, ao longo de máis de 29.000 metros deste tramo ferroviario, consistirán na instalación de dous tipos de cerramento, en función da zona de actuación:

• Cerramento montado sobre un bastidor, con montantes encastrados en murete de formigón armado, en 11.200 m.
• Malla metálica progresiva ou cinexética, con reforzo para a fauna existente, nunha lonxitude de 18.000 m.

Os traballos realizaranse integramente en terreos de titularidade do Adif, polo que non será necesaria a tramitación de expropiacións, nin a reposición de servidumes ou servizos afectados.