A portavoz popular, Katy Varela, denuncia na moción o estado que
presentan actualmente os aparcadoiros da Rúa Hortas, Rúa Conde e Rúa Xulio Camba, tres superficies de estacionamento público no centro de Monforte que están cheas “de enormes fochancas e pozas de auga que as fan intransitabeis e deterioran a imaxe da cidade”, subliña.
Katy Varela reclama ao grupo de goberno do Concello que cumpra coa súa obriga de manter e arranxar estes terreos privados de uso público, e que na actualidade teñen unha enorme demanda ao ser as tres zonas de aparcadoiro máis céntricas da cidade e na contorna do casco histórico.
A proposta alude de xeito especial ao aparcadoiro situado na céntrica Rúa Hortas, que na actualidade presenta un estado de enorme deterioro e difícil acceso. A voceira asegura que, segundo o contrato de arrendamento deste terreo firmado polo alcalde, José Tomé co propietario do mesmo, o Concello “ademais de pagar a renda pactada, comprométese segundo a cláusula segunda, a levar a cabo as reparacións necesarias no inmoble para cumprir coa función sinalada no contrato”.
Varela engade que o grupo popular recibiu abundantes queixas de usuarios
habituais destes estacionamentos, especialmente veciños procedentes de
parroquias próximas ao casco urbano de Monforte, que protestaron polo mal estado que presentan e polas irregularidades do terreo, que dificultan e
praticamente impiden a súa utilización “especialmente por persoas de idade avanzada”. Katy Varela reclama ao alcalde que cumpra coa súa obriga para manter de xeito adecuado este servizo para veciños e visitantes. “Se o alcalde presume dos orzamentos máis sociais o que ten que facer é manter e conservar en perfectas condicións este servizo de atención aos cidadáns de Monforte”, remata Katy Varela.
