O Concello de Pantón volveu ser o pechacancelas dos desfiles de Entroido do sur de Lugo pero a estratexia estalle funcionando moi ben. Dende hai uns anos, a decisión de postpoñer este evento á fin de semana seguinte ás grandes datas do entroido fai posible que a participación aumente co conseguinte atractivo para que moita xente se achegue a Ferreira.
Un total de 34 comparsas chegadas desde diferentes concellos do sur de Lugo desfilaron dende o CEIP Monte Baliño ata a Praza do Concello cun percorrido que comezou ás 16:00 h. e rematou arredor das 18:00 h. Unha vez na praza, acomodáronse as carrozas nas rúas laterais e encheuse o espazo de xente nun gran ambiente, con acompañamento musical a cargo do colectivo Baturruka Monforte e unha charanga ademais doutros atractivos para participantes e público asistente: entrega de lambetadas para todos os cativos e cativas e chocolatada popular para facerlle fronte ao frío.
A continuación, xa anoitecendo, xuntouse o xurado a deliberar e fixéronse públicos os premios, que foron os seguintes:
INFANTÍS
Grupo C
1º Premio para “Os Superthings de Pantón e 2º Premio para a comparsa “Parchís, Chis, Chis”.
Grupo B
1º e único premio para “Desayuno junior”
Grupo A
1º Premio para “Invasión de Ourizos Cachos”, 2º para “Os celtíveros do Monte Baliño” e 3º para “Os celtairóns”.
ADULTOS
Grupo C
1º Premio para “La Blasa”, 2º para “Aladín y la princesa Yasmín” e 3º para “Os arrieiros pola Ribeira Sacra”.
Grupo B
1º para “Autolavados Rachelo”, 2º para “A horta de Balbina” e 3º (2 premios): “Os Zánganos da Ribeira Sacra” e “Autitos Chocones”.
Grupo A
1º Premio para “A pavonearse por Sober”, 2º “Dende Canarias a Pantón” e 3º para “Volando voy”.
