A Fundación Real Monte Manso di Scala organizou o sábado 25 de marzo a celebración dun acto conmemorativo do cuarto centenario da morte do VII Conde de Lemos. A institución, como homenaxe, decidiu encargar a realización de dous bustos ao escultor Riccardo Ruggiano. As esculturas representan a D. Pedro Fernández de Castro e a Giovan Battista Manso, pretenden ser un agradecemento por fundar a Academia Napolitana dos Ociosos e foron colocadas na escaleira principal do edificio da sede histórica de Monte Manso.
Dende Monforte desprazáronse a Nápoles para asistir ao acto, Gloria Prado, a Tenente de Alcalde, e Marina Doutón, concelleira de Cultura. Gloria Prada fixo alusión “á unión entre as dúas cidades, Nápoles e Monforte, propiciada polos vínculos culturais que estableceron os Condes de Lemos en ambas”, engadindo que “as pegadas do Conde de Lemos en Nápoles pódense apreciar na existencia do Palacio Real e o Museo Arqueolóxico Nacional, mandado construir por D. Pedro para a Universidade, así como na Fundación do novo Colexio da Compañía de Xesús e Iglesia de S. Ferdinando”.
Tamén se fixo referencia na intervención, a que os Condes deixaron unha parte das obras adquiridas en Nápoles no museo monfortino das Madres Clarisas, comentando ademais que estes tiveron un detalle moi salientable coa cidade italiana denominando a unha zona de Monforte como “Posilipo”; claramente como lembranza á zona de Nápoles onde viviron. Nesta zona, situada xusto a carón do Rio Cabe, historiadores tan prestixiosos como a Doctora Manuela Sáez, presente tamén no acto, defenden que se construiu o palacio residencial dos Condes de Lemos ao seu regreso de Nápoles. Conta a historia que cando o Virrei Cardenal Borxa se atopaba en Nápoles escribiulle unha carta á Condesa de Lemos, a súa prima, na que lle decía: “Por ese Posilipo monfortino, deixaría eu este, napolitano”.
