O candidato popular á alcaldía, Jose Rodríguez, explica que “dende que se construíu -nunha zona próxima ao polideportivo e ao colexio- non recibiu ningún tipo de atención nin de mantemento” e, polo tanto, “agora atópase en moi malas condicións”. De feito, “supón un risco para os usuarios: parte da madeira está en mal estado, hai táboas soltas ou rotas e puntas e cravos saíntes”.

Rodríguez sinala que “de pouco serve construír infraestruturas se non hai intención de conservalas en bo estado para que os veciños e veciñas podan facer uso delas en condicións de seguridade. Ou para que, como pode ser neste caso ao tratarse dunha infraestrutura pouco común na zona, sirvan de reclamo para visitantes -tras ser debidamente promocionada- contribuíndo tamén a dar actividade a San Clodio, ao comercio e á hostalería local”.

Nese sentido, o popular aposta por “un plan de conservación das instalacións municipais ao longo dos anos e por manter bo contacto coas outras administracións para que a información que poda ter o Concello como administración máis próxima aos veciños, chegue ao resto de administracións nos casos de infraestruturas que sexan competencia doutra”.