O acto será presentado pola responsable comarcal do BNG, candidata á alcaldía de Pantón, Rosana Prieto Florines. Intervirán o responsable local, Local Manuel Luaces, e Margarita Rodríguez que conforman o primeiro tramo da candidatura encabezada por Emilio J. Sánchez. Acompañaranos tamén a portavoz nacional do BNG, Ana Pontón, e as demais persoas que integran a candidatura monfortina.

Os nacionalistas convidan á veciñanza a acudir á presentación desta candidatura, acto no que tamén presentarán as ideas principais “para darlle a Monforte o cambio que precisa, porque nós temos proxecto pensado e planificado desde Monforte e para Monforte, non unha suma de ocorrencias, para executarmos no medio e no longo prazo, e que se pretende un proxecto común no que ninguén sobre, que nace coa vontade de crecer e de mellorar o presente e o futuro do noso municipio, que teña ás persoas no centro”, asegura Manuel Luaces Fernández.