O Courel sempre sorprende, pola súa paisaxe por suposto, pero tamén pola enerxía creativa e as actividades culturais que se se desenvolven naquela contorna.
Unha delas será mañá e terá lugar na fermosa aldea de Vilamor. Baixo o título de “Koñazo Fest” o colectivo “As Mullerengas” e “Doña Cona” organizan unha xornada en clave feminista cun variado programa de actividades.
Ás 11:00 h. haberá un obradoiro con barro que consistirá na elaboración representativa do Udu africano (instrumento de orixe feminino) e ás 12:00 h. un “empoderamento feminista ao son do tambor”.
Para as 14:00 h. está programado un xantar e chocolatada, ás 18:00 h. unha sesión de serigrafía dende perspectiva feminista e ás 17:30 h. un monólogo a cargo da narradora Carmen CondeGaute baixo o título de “A virxe maila puta”.
O remate deste evento en clave feminina será ao anoitecer coa celebración dun magosto con acompañamento musical na enxebre cantina coñecida como Cova da Moura.
