Do acto de prensentación de Por Chantada participaron as persoas que levan traballando e prestando apoio dende os comezos; e ducias de caras novas interesadas en coñecer as propostas, “dunha equipa de mulleres e homes multidisciplinar e transversal, con vontade e capacidade, e cun plan para a vila adaptado ás necesidades dunha Chantada futura e con futuro.”
Juan Ramón Vázquez, nº 8 da candidatura, destacou a capacidade para “construír unha vila na que as xeracións vindeiras poidan botar raíces”; Ana Rodríguez, nº 5 da candidatura, puxo de relavancia o sector primario no municipio, “e a necesidade de actuar ante a pasividade da actual administración local”. A nº 3 da candidatura, Helena Fernández referiuse a importancia de considerar a igualdade dun xeito real e efectivo como aspecto transversal en todas as políticas que se desenvolvan a nivel local en todos os ámbitos.
O candidato á alcaldía, Antom Fente; destacaba que “o cambio que busca Por Chantada ten como prioridade absoluta o ben de todas e todos; e que é o momento dun voto intelixente, esperanzado, ilusionado para vencer calumnia, o medo, e a prepotencia”. O candidato salientaba tamén a “valía, preparación, e experiencia da súa equipa para conseguir o cambio mediante un traballo efectivo e transparente”.
