Francisco Conde, tras visitar en Palas de Rei as instalacións de Granja Campomayor, apuntou que esta empresa é un exemplo “de como a través da innovación e o deseño se pode mellorar a competitividade e gañar mercado”.
A compañía foi unha das beneficiarias do programa InnovaPeme, que tal e como sinalou Conde, permite que as pequenas e medianas empresas poidan “afrontar os retos da transformación industrial”. Granja Campomayor, que conta co selo de Galicia Calidade, é unha empresa familiar de cuarta xeración.
A Xunta de Galicia lanzará proximamente unha nova convocatoria desta iniciativa por 4,5 millóns de euros, integrando o programa DeseñaPeme, e co obxectivo principal de axudar ao tecido empresarial a incorporar a I+D+i e o deseño nos seus procesos produtivos.
O vicepresidente económico da Xunta de Galicia, animou ás empresas a estar atentas para solicitar estas axudas e comentou, respecto de Campomayor que se trata dunha compañía “con vocación innovadora desde o rural, que está mellorando os seus procesos e produtos e buscando novos formatos para poder ofrecer aos clientes” para que “poida haber un impacto desde o punto de vista da comercialización tanto no eido nacional como no internacional, onde está gañando mercado”.
