E xa imos polo segundo certame rematado. O 27 de maio volvemos ao Centro sociocultural de Bóveda acompañados pola calidade musical dunha gran artista, Marta Pérez-Batallón, que amenizou o slam encetándoo cunha fermosa interpretación acompañada do seu ukelele. Quedamos encantados nós e o público e agardamos, así nolo prometeu, que volva participar no Bóveda Slam Poetry noutras ocasións.

   Despois da actuación de Marta presentamos a un dos poetas anotados para o slam, pero que, ao chegar a petición da súa inscrición cando xa estaban as sete prazas cubertas, participaba como reserva e quedaba así anotado de titular para o seguinte slam. Joserra, estudante dunha FP media de enfermería en Monforte que veu dende o concello de Taboada e foi o encargado de recitar a modo de “poeta de calibración”. Declamou dous dos seus poemas e someteuse, aínda non entrar na competición, ao voto do público. Non son relevantes aquí as puntuacións que recibiu xa que non foron importantes para a competición, non así os aplausos que lle deu un público, encantado cos seus versos. De seguido encetouse o slam propiamente dito e a foliada poética viuse inmersa en ovación tras ovación dun público que gozou no serán coas interpretacións dos slamer.

Participaron neste combate: Galego de Caracas, Guímaro, Roberto López Veiga, Noa Moreira, Yolanda Álvarez, Sonia Pérez e León Ferrini.

   Acadaron pasar á segunda rolda o rapsodo, Galego de Caracas, lucense gañador do premio de poesía “O Facho 2023”, que conseguiu facerse coa cunca de bronce tras Yolanda álvarez, vate de Rubián, que recitou por primeira vez nun slam e que levou a cunca de prata. Noa Moreira, recoñecida poeta da Pobra do Brollón, que xa participara no slam de marzo, acadou a cunca de ouro, e deste xeito, quedou clasificada para a Gan Final que previsiblemente será en novembro.

“Xa temos as dúas primeiras clasificadas para a Gran Final: Iria Seoane, cunca de ouro do primeiro slam, e Noa Moreira”

   Dende a organización damos as grazas ao Concello de Bóveda e á Librería Pelayo pola súa colaboración e o seu apoio e, sobre todo, ás e ós poetas que participaron e que nos agasallaron con outra velada cheiña de arte poético. Tamén, como non pode ser doutro xeito, ao público, unha parte fundamental do slam, que colaborou activamente puntuando as intervencións dos poetas. Non esquecemos o anaquiño musical con que nos obsequiou Marta Pérez-Batallón.

   E xa están abertas as isncricións para o seguinte, o terceiro slam que se celebrará o 1 de xullo ás 19:00 h. Desta vez cambiamos a localización, para ir achegándonos ao público de distintos xeitos, e o seguinte combate farase no restaurante Paco, de Rubián.

O 3º Slam Poetry de Bóveda será o 1 de xullo no restaurante Paco de Rubián

É emocionante ver que o proxecto Bóveda Slam Poetry vai camiñando paseniño, pero camiñando. Aínda nos quedan tres certames para chegar a Gran Final e animamos aos poetas que aínda non participaron nesta disciplina de poesía escénica a que o fagan. Unha forma de divulgación da poesía que se achega máis ó pobo, á rúa e en Bóveda, ao rural.

Para participar só hai que mandar un correo a bovedaslampoetry@gmail.com indicando o desexo de participar, incluíndo o nome e/ou o pseudónimo e un número de teléfono. Facéndoo así ficaredes anotados e tede en conta que respondemos a tódolos correos dando as indicacións precisas.