A XIX edición da Festa da Cereixa, do Viño e do Aceite puxo en valor esta pasada fin de semana a excelencia destes tres produtos que se dan no val do Sil, un río que conta dende o sábado cun Centro de Interpretación propio en Torbeo grazas ao investimento cultural que fixo posible o Concello de Ribas de Sil.
A Deputación de Lugo achegou 9.000€ a través do Plan Único de Cooperación cos Concellos 2023 para a celebración deste festexo que tivo como marco incomparable a Praia Fluvial de San Clodio e que contou coa presenza do Presidente en funcións da Deputación de Lugo, José Tomé Roca e mais do Alcalde en funcións de Ribas de Sil, Miguel Ángel Sotuela.
José Tomé Roca enxalzou na xornada do domingo a calidade destes emblemas autóctonos da gastronomía da Ribeira Sacra, e felicitou aos produtores e adegueiros “por lograr uns produtos únicos de altísima calidade, que se elaboran mantendo as técnicas tradicionais, ademais de que son a nosa mellor sinal de identidade levando o nome dos nosos territorios por todo o mundo“.
Destacou tamén o compromiso da institución provincial con esta cita que vén apoiando ano tras ano xa que se trata “dun importante revulsivo económico e turístico, que impulsa o patrimonio gastronómico que temos e que xera un efecto multiplicador na nosa economía, incidindo especialmente no sector servizos”.
ACTIVIDADES DO DOMINGO
Na xornada dominical tivo lugar o pregón do Doutor en Arqueoloxía nado en Torbeo, Luis Francisco López González e o recinto feiral contou con postos dos produtos exaltados e outros relacionados coa artesanía e a alimentación. Houbo degustacións, amenización musical a cargo da Charanga KM0 e abríronse ao público os Centros de Interpretación do Río Sil (CIRS), en Torbeo –inaugurado na xornada do sábado– e o da Minaría Aurífera Romana (CIMAR).
Pola tarde, ás 17:00 horas, tivo lugar no Salón de Actos do Concello, a presentación do libro Historias do concello de Ribas de Sil, do profesor Manuel Cao, e ás 20:00 horas actuaron no anfiteatro da Praia Fluvial os grupo de baile de San Clodio e de Quiroga.
