A Asociación Veciñal do Saviñao diríxese á empresa Vodafone-España para solicitar o cambio de localización das antenas de telefonía móbil da localidade de Escairón (concello O Saviñao). “Trátase de dúas estacións radioeléctricas de GSM e UMTS colocadas en depósito de auga no barrio de Mondavide de Escairón, en chan e núcleo urbano, codificada co n.º 15621, que reciben permiso municipal de instalación o 6 de novembro de 1997 a nome da empresa AIRTEL. A instalación complétase en 2003. A preocupación veciñal vén da alarma provocada pola contabilización duns 20 casos de cancro entre a veciñanza dun perímetro de 400 m das antenas, o que supera a prevalencia estimada no Estado”, insiste a asociación.

A reclamación veciñal para o cambio de ubicación comeza en 2004 cando se entregan 150 firmas á Alcaldía solicitando a súa retirada. En 2011, coincidindo coa inmediatez da caducidade do contrato, repítese a solicitude; “Pese ao compromiso verbal do alcalde, en 2012 o permiso é renovado coa mesma localización.”

O pasado ano 2022 a veciñanza do barrio afectado diríxese á Valedora do Pobo de Galicia, e o rexedor comprométese a solicitar un informe técnico para valorar unha nova localización. Os argumentos que aluden os veciños son:

• Estan situadas nunha “contorna sensible” dada a proximidade das antenas ás vivendas, situadas a menos de 100 m., así como ao colexio de ensino primario de Escairón.
• A existencia de numerosas áreas para unha nova localización que non cause preocupación aos veciños, de feito non existe ningunha instalación similar doutras compañías situada en zona urbana.
• A consideración de Principio Precautorio que aconsella a adopción de medidas preventivas ante unha alerta social pola ameaza contra a saúde sentida pola poboación.
• A existencia dun Código de Boas Prácticas para a instalación de infraestruturas de telefonía móbil.

Despois deste tempo de reclamacións, a asociación veciñal solicita da empresa responsable, Vodafone, a retirada das devanditas antenas e o cambio de localización, sempre fóra de chan urbano e nunca a menos de 500m. das vivendas e a menos de 1000 m. de centros de carácter público.