O Alcalde de Monforte, José Tomé Roca, informou este luns de que a Xunta de Goberno acordou que o Concello se persone como acusación popular no caso das dúas mozas presuntamente agredidas sexualmente na madrugada do martes pasado na localidade. 

Tal e como indicara o alcalde no comunicado remitido aos medios e aos cidadáns de Monforte o pasado 16 de agosto, a intención do goberno municipal era a de personarse como acusación popular, co obxectivo de que “caia sobre os presuntos culpables, todo o peso da lei”.

Deste xeito, o rexedor deu traslado aos servizos xurídicos da Deputación de Lugo, que presta este tipo de servizos ao Concello monfortino, para que leve a cabo as xestións e accións necesarias para exercer como acusación popular neste caso, que está en mans do Xulgado e da Policía Nacional.

Dous mozos, un maior de idade e outro menor, foron detidos a semana pasada acusados de agredir sexualmente a dúas mozas menores, durante as festas de localidade.

O alcalde monfortino expresou que os veciños da localidade “rexeitan taxativamente calquera tipo de agresión e moi especialmente se se trata de agresións sexuais a mulleres”. “En Monforte non cabe ningún tipo de comportamento machista nin delitos contra a integridade e a liberdade sexual das mulleres, especialmente se son cometidos con menores de idade”, apuntou.

Finalmente, o Concello está a disposición das familias “para axudarlles a superar este momento tan difícil, prestando se fose necesario, apoio legal, psicolóxico ou doutro tipo que precisen”.