As mesas de traballo previas desenvolvéronse, aparte do Courel, nas zonas do Barbanza, do Macizo Central Ourensán, Valdeorras e Verín. Así, abranguen unha superficie de 17 concellos e máis de 245.000 hectáreas de terreo. O obxectivo é avanzar en distintas fases para recuperar e poñer en valor estas zonas.
Realizáronse un total de 132 entrevistas e 10 encontros de intercambio con máis de 60 axentes destas áreas, como cargos e técnicos de diferentes administracións, empresas xestoras, axentes forestais, profesionais da madeira, gandeiros, comuneiros e cidadanía en xeral. Os principais obxectivos, a compilación de propostas de uso e xestión do territorio, dende os puntos de vista forestal, agrogandeiro, ambiental e social-recreativo, identificar os axentes interesados en levar a cabo propostas, así como priorizar as áreas de actuación de cara a mellora da resiliencia fronte ao lume.
O taller de hoxe tiña por obxectivo presentar as máis de 200 propostas recollidas, e avanzar na súa priorización segundo urxencia, así como na recollida de novas propostas no caso de detectar outras necesidades.
No caso concreto do Courel traballarase nos concellos de Folgoso, A Pobra do Brollón, Quiroga, Samos e O Incio. Esta zona foi unha das máis afectadas polos lumes do 2022, con áreas que na súa meirande parte pertencen a montes de xestión pública. Coa información recollida formuláronse unha serie de propostas de actuación. Contémplanse cuestións coma a valoración dos cambios de especies forestais, para mellorar as resiliencia fronte ao cambio climático e os lumes forestais; propiciar a xestión activa e o control da biomasa, contemplando o gando como medio de xestión do territorio ou facilitar e fomentar a recuperación de soutos e doutras masas frondosas autóctonas.
Tamén se levarán a cabo actuacións de carácter institucional, como a implementación da execución de labores preventivos en diferentes montes veciñais en man común ou o fomento do asociacionismo e a xestión continua. Valoraranse outras propostas relacionadas coa plantación de árbores froiteiras, a rehabilitación de vivendas ou o aproveitamento de zonas vitícolas de alto valor.
Fondo público-privado para anticiparse aos incendios
O conselleiro fixo fincapé na planificación estratéxica posta en marcha polo Goberno galego, que implicará unha acción integral no territorio. Para levar isto a cabo, tal e como indicou José González, cóntase coa colaboración aberta pola Xunta para crear un novo fondo público-privado para anticiparse aos incendios.
Neste sentido, agradeceu a incorporación de Inditex a este fondo, cunha achega de 9 millóns de euros, que permitirá intervir en 26 concellos e beneficiar a unhas 118.000 persoas. Este fondo naceu co fin de crear un territorio resiliente ao lume, restaurar os espazos afectados e levar a cabo unha política de xestión da paisaxe centrada na prevención.
O fondo permitirá realizar unha planificación transversal da área rural afectada delimitada polo seu perímetro natural, dando prioridade aos labores de prevención de incendios, ao tempo que se procurará a implantación de actividade agrogandeira e forestal sostible para apoiar a poboación local. Este proxecto tamén contempla actuacións para impulsar a creación de descontinuidades na vexetación e nas masas arbóreas das zonas rurais afectadas polo lume, para evitar futuros incendios e reducir o seu impacto ambiental e socioeconómico.
