Este luns presentouse unha nova edición da Queima das Fachas de Castelo, no concello de Taboada, que se celebra na noite do 7 ao 8 de setembro coa colaboración da Vicepresidencia da Deputación de Lugo, que achega 3.000€ a través da área de cultura.
No acto participaron o presidente da asociación, Manuel Fidalgo, o alcalde de Taboada, Roi Rigueira, o concelleiro de Cultura de Taboada, Manuel Diéguez, deputada de Cultura, Iria Castro e Paloma Vázquez, xefa provincial de turismo en Lugo.
A xornada do xoves comezará coa colocación das fachas no alto da castro desde as primeiras horas da mañá. Na xornada de tarde, no local social de Castelo realizarase un taller de construción de fachas. A partir das 21.00 horas, celebrarase a cea popular previa ao acendido das fachas, que comezará as 23.30 horas.
A Queima das Fachas de Castelo, declarada Ben de Interese Turístico e Festa de Interese Turístico, é unha das tres festas do lume que se conservan en Galicia, xunto a de Vilelos, no Saviñao, e a de Castro Caldelas. A Asociación Cultural As Fachas participa en xornadas e outras iniciativas de difusión e estudos das festas do lume na Península.
Iria Castro remarcou “a implicación da veciñanza para dar continuidade a esta tradición e manter o patrimonio inmaterial e material que conforman a nosa identidade”.
Festa das Fachas presentación 2023 / Vicepresidencia Deputación
