O Presidente da Deputación de Lugo, José Tomé Roca, asinou este martes cos representantes de dúas empresas chantadinas e ante notario os contratos de compravenda de dúas novas parcelas do polígono industrial dos Acivros, no concello de Chantada, un complexo que pasou a xestionar directamente a institución provincial trala extinción da Sociedade Urbanística Provincial (SUPLUSA).
Os alleamentos destes terreos leváronse a cabo a través dun proceso de adxudicación directa, tras os senllos escritos presentados polas empresas no mes de xullo, nos que mostraron o seu interese en adquirir as devanditas parcelas.
Con estas dúas novas adxudicacións, suman 37 as parcelas vendidas a día de hoxe no polígono industrial de Chantada. Un complexo que conta cun total de 49 parcelas, das cales 7 están reservadas. Así o parque chantadino ten a día de hoxe 5 espazos dispoñibles cunha superficie media de 1.100 metros cadrados.
