O alclade considera que a sentenza é “completamente clara e rotunda e desbarata todos os argumentos alegados polos concelleiros do Grupo Municipal do PP, ata o punto de que lle impón as costas do proceso”. Por este motivo, o alcalde invita aos populares “a pasar páxina, a renunciar á presentación do recurso de apelación e a sumarse a un proceso en positivo para conseguir fondos doutras administracións que permitan custear un ambicioso proxecto de reforma das instalacións da Feculera”.
Segundo o rexedor, a previsión é traballar en paralelo na elaboración dunha memoria que defina os aspectos técnicos da rehabilitación arquitectónica e os novos espazos e usos e, por outra parte, “tratar de sumar esforzos entre todas as forzas políticas de Sarria para conseguir os fondos necesarios”.
“O lóxico sería alcanzar un compromiso a tres bandas entre o Concello de Sarria, a Deputación de Lugo e a Xunta de Galicia para dotar ao pobo de Sarria dunha infraestrutura sociocultural acorde ás necesidades actuais e futuras”, indicou Garrido, ao mesmo tempo que subliñou que o proxecto do Centro Sociocultural “Familia José Vento” sería “fundamental para impulsar a revitalización da contorna da Estación”.
“Máis aló das discrepancias políticas que poida haber noutros temas, creo que o proxecto da Feculera é unha iniciativa na que tanto o PP, como o PSOE e o BNG teñen que implicarse e aproveitar as súas conexións coa Deputación e a Xunta en beneficio de Sarria. A veciñanza non entendería que non fose así”, opinou Claudio Garrido
