O proxecto “O Courel destino e futuro vital”, promovido por Noa Innova e co apoio do MITECO, organiza o vindeiro venres 22 de setembro unha xornada dedicada especialmente ás Mulleres Emprendedoras.
Entre as 10:00 e as 14:30 h. debaterán no salón de actos da Casa da Cultura de Quiroga sobre o desenvolvemento local e as medidas que compre adoptar para fomentalo e que este sexa viable e efectivo. Neste senso poñeranse enriba da mesa temas como son os investimentos necesarios para favorecer o crecemento económico, a creación de emprego e a fixación de poboación con diversas actuacións para afrontar o reto demográfico na comarca de Quiroga.
Esta iniciativa, como outras que está a impulsar o devandito proxecto, ten como obxectivo xerar unha dinámica entre os cidadán, empresas e administracións para que fluan os investimentos nos tres concellos implicados nesta iniciativa (Folgoso, Quiroga e Ribas de Sil).
O desenvolvemento económico deste territorio, que conforman os concellos do Xeoparque Montañas do Courel, pasa polo desenvolvemento turístico, a atracción de visitantes e a creación de novas empresas e empregos.
PROGRAMA
O programa para a xornada está estruturado en tres mesas de exposición e debate con diferentes relatores/as e un tema de partida. A Mesa 1 leva por título “Mulleres emprendendo e como financiar os seus proxectos”, a Mesa 2 “Mulleres emprendendo. Potenciando un territorio”, e a Mesa 3 “Mulleres emprendendo en turismo e gastronomía”.
As tres mesas estarán moderadas pola comunicadora Mar Castro e entre as persoas relatoras salientar a presenza de autoridades como son Pilar Fernández, Xefa Territorial de Emprendemento de Lugo; Rafael Rábade Blanco, Técnico Superior do IGAPE, Verónica Buide, Presidenta da Asociación Iberoamericana de Mulleres na Industria da Animación; e Paloma Vázquez, Xefa Territorial de Turismo de Lugo.
Entre as emprendedoras relatoras haberá algunha local como Isabel Álvarez, arquitecta, e Maira López, hostaleira de Casa Pepe en Santa Eufemia.
A presentación, que dará comezo á xornada ás 10:00 h., correrá a cargo de José María López Bourio, representante da organización do proxecto “O Courel, destino e futuro vital”; e de José Luis Rivera, Alcalde do Concello de Quiroga.
