A semana pasada dende o concello da Pobra do Brollón recomendaron non consumir a auga da billa en case unha vintena de parroquias e lugares do municipio. O día 19 o servizo de auga da zona de Barxa de Lor quedou restablecido, polo que xa se pode consumir sen risco, segundo comunicou o concello a través dun bando.

O concello informa que desde este mércores tamén se normalizará a situación no resto do municipio ao levantar as restricións na zona de Loureiro, “porque as analíticas xa están dando os parámetros óptimos para a potabilidade”, Xosé Lois Maceda, alcalde da Pobra do Brollón.

O problema é consecuencia das choivas torrenciais da semana pasada, que causaron arrastres do monte, deteriorado polos incendios do ano pasado e as talas de madeira, afectando aos ríos que abastecen á Pobra do Brollón de auga. Ao parar a intensidade das choivas, remite o problema da auga. Desde o concello aseguran que traballan para buscar solucións a medio e longo prazo. O vindeiro luns, dende a empresa Lincold Ibérica farán unha visita para analizar a rede de abastecemento e propoñer posibles melloras. “A rede do concello, que herdamos de gobernos anteriores, precisa melloras estruturais complexas e custosas. Esforzarémonos en facilitalas implicando a outras institucións para evitar na medida do posible que se reproduza esta situación, da que o concello e a súa veciñanza somos vítimas,’ declara o rexedor da Pobra.