O Deputado de Promoción Económica e Social, Pablo Rivera Capón; a primeira tenente de Alcalde de Monforte, Gloria Prada; o Director de AGACAL, José Luis Cabarcos; e o presidente do Consello Regulador da Agricultura Ecolóxica de Galicia, Francisco López Valladares, participaron este venres 22 de setembro na xornada conmemorativa do Día Europeo da Agricultura Ecolóxica. No acto aproveitouse para presentar o libro Os Bolechas, os alimentos ecolóxicos, publicación impulsada polo devandito organismo.
A devandita xornada estaba organizada polo Consello Regulador da Agricultura Ecolóxica de Galicia (CRAEGA) e contou coa participación de máis de 400 nenos e nenas de centros educativos de Monforte que encheron o Auditorio do Edificio Multiusos.
Gloria Prada resaltou os valores que a Agricultura Ecolóxica ten na sociedade, “pois os produtos do campo son fundamentais para a nosa alimentación, para comer de forma saudable, e especialmente os certificados como ecolóxicos”, pediulle á cativada que aprezara o valor e sabor dos produtos ecolóxicos e agradeceu a iniciativa do CRAEGA organizando a xornada.
Pola súa parte, o deputado provincial Pablo Rivera Capón animou aos máis pequenos a plantar e traballar os seus propios alimentos, e coñecer como facelo dun xeito ecolóxico, destacando a importancia destes recursos educativos para fomentar entre os nenos e nenas o coidado do planeta e o desenvolvemento sostible.
No transcurso do acto, tras as intervencións das autoridades, tivo lugar a presentación do libro, houbo unha actuación de rock infantil e familiar a cargo de Pakolas, apareceron Os Bolechas e tamén o propio autor da publicación, Pepe Carreiro, quen debuxou a estes recoñecidos personaxes en directo.
