A Asociación Xuvenil Buraca das Grellas de Teixeira do Courel organiza unha xornada de Cantos de Taberna o vindeiro sábado 30 de setembro no Courel, concretamente nas poboacións de Seoane, Esperante, Ferreirós, Vilamor e Santa Eufemia.
Dende as 19:00 h. haberá ambiente de música e cantos tradicionais en 7 locais do concello de Folgoso do Courel rematando a troula unha foliada final a partires das 23:00 h. no Bar Anduriña de Seoane.
Os locais que participan nesta V edición son os seguintes: Bar Pombo (Seoane), Bar Anduriña (Seoane), Bar Rafael (Seoane), Acampamento (Esperante), O Pontón (Ferreirós), Bar Pepe ( Sta Eufemia) e A Cova das Mouras (Vilamor). Todos os establecementos terán camisolas á venda para colaborar co evento.
No apartado musical chegan ao Courel 14 agrupación de música tradicional de diferentes lugares de Galicia, calculando que en total a presenza de forasteiros alcance as 140 persoas.
Dende a asociación organizadora desta xuntanza “animan a toda a xente a ir, xa que fará bo tempo e poderemos escoitar moita música de raíz nun lugar privilexiado como é o Courel”. Tamén colabora no evento a Asociación de Desenvolvemento Rural Serra do Courel.
