Esta edificación alberga distintos servizos e locais da administración municipal, como os locais do persoal da Brigadas de Obras, Parques e Xardíns (Medio Ambiente) e dos Técnicos Electricistas, así como a oficina e almacén de Protección Civil do Concello. Esta planta baixa está actualmente dotada de diversos almacéns que albergan todo tipo de material das distintas Brigadas, así como aseos, unha oficina e un aparcamento para vehículos municipais.
O obxectivo das obras, segundo sinalou o alcalde, José Tomé Roca, “é mellorar e adaptar estas instalacións da nave da rúa Duquesa, que estaban obsoletas, para que o persoal municipal poida contar cunhas instalacións axeitadas ás súas necesidades, á vez que se aumenta a seguridade de uso desta edificación”.
Na planta baixa melloraranse os aseos, a oficina e os diversos almacéns utilizados polas Brigadas municipais. Na planta alta levarase a cabo a construción duns novos vestiarios e aseos, adaptados e accesibles e melloraranse tamén os almacéns existentes. Para acceder á planta alta instalarase un novo ascensor accesible, cunha cabina de 1,40 x 1,10 m., e construirase tamén unha escaleira de acceso a esta planta alta, dotada dunha varanda de seguridade.
O prazo de presentación de ofertas para aquelas empresas que estea interesadas en levar a cabo estas actuacións de mellora permanecerá aberto ata o 24 de outubro de 2023. As mesas de contratación terán lugar o día 30 de outubro, a mesa administrativa, e o 6 de novembro a mesa para apertura da oferta económica. Unha vez sexa adxudicada a obra, o prazo de execución da mesma será de 4 meses. O orzamento que destina o Equipo de Goberno para esta actuación é de 90.000,02€, IVE engadido.
Criterios de adxudicación
Para a avaliación das proposicións e a determinación da oferta economicamente máis vantaxosa atenderase a varios criterios obxectivos de adxudicación, directamente vinculados coa prestación obxecto do contrato.
- Oferta económica: 40 puntos.
- Memoria técnica: 40 puntos.
- Ampliación do prazo de garantía: 10 puntos.
- Melloras de execución: 10 puntos.
