Os concelleiros populares preguntaban no pleno se o concello solicitara as axudas da orde da Consellería de Política Social para poder ampliar as prazas das escolas infantís municipais ou para crear os PAIs (Puntos de Atención á Infancia). Lamentan a resposta negativa do alcalde a pesar de que “as prazas coas que conta o centro son insuficientes para poder atender á demanda existente”.

Katy Varela lamenta que o alcalde afirmara que como rexedor non solicitaría este tipo de axudas e que “é un esforzo manter aberta a escola infantil” e considérao “unha absoluta falta de respecto a todos os usuarios da mesma, ademais de a todas as familias que se atopan na lista de agarda”.

Para os populares manter a escola infantil aberta e aumentar o número de prazas da mesma “non é un esforzo, é manter un recurso fundamental para a conciliación familiar e para poder asentar poboación na cidade e debería ser prioritario para todo alcalde”. Katy Varela critica a negativa de Tomé para solicitar estes recursos da Xunta, “cando son só os concellos os que por lei poden crear os PAIs.”