Dende a asociación “Chantada Contra o Cancro” organizan este tipo de encontros contando con profesionais sanitarios vinculados a diferentes aspectos que poden influír nas persoas que padezan cancro e nas persoas coas que se relacionan: oncólogos/as, psicólogos/as, enfermeiras, traballadoras sociais, endocrinos/as, logopedas, terapeutas ocupacionais, nutricionistas… “Cremos que abordando o cancro de xeito integral é a mellor maneira para poder axudar máis aos afectados/as”, sinalan desde a asociación.
Na conferencia-coloquio deste venres, 24 de novembro, Olga Vecín de la Fuente falará do consumo de alimentos procesados e ultraprocesados no día a día e a súa repercusión na nosa saúde, ademais da súa relación cos diversos tipos de cancro. E por outra parte, dará uns pequenos consellos sobre como escoller os mellores alimentos mediante a lectura das etiquetas cando estamos facendo a compra. A conferencia está aberta a todas as persoas interesadas.
