A Festa da Pisa 2023 comeza a súa conta atrás. Para promovela e lembrar a súa celebración, este venres 24 de novembro membros da Asociación Fonte do Milagro, organizadora do evento, acudirán ao programa “Quen Anda Aí ?” da TVG.

A edición deste ano terá lugar, como é tradicional, no Campo da Festa da aldea de Froxán e será o venres 8 de decembro.

Ademais da divulgación do proceso de secado, pisado e abandoxado das castañas secas, haberá unha presentación literaria dobre: “Animais fantásticos de aldea” e “Galicia latente. A Galicia do presente”.

O pregón correrá a cargo de Rosa Cedrón ás 13:30 h. e como atractivo engadido a esta exaltación tradicional da ‘Pisa da castaña seca’ haberá unha carpa onde se poderá degustar o ‘Menú do Pisador’ e postos de artesanía e produtos da terra.