Os concelleiros da Agrupación Municipal do Partido Popular de Monforte de Lemos esixen tanto a BNG como ao PSOE de Monforte “claridade, rigor e veracidade”, ao coñecer que o BNG leva a pleno unha iniciativa reclamando á Xunta medidas urxentes para a cobertura de vacantes no municipio, tanto no hospital como no centro de saúde, “unha reclamación que compartimos, como toda a sociedade, pero dende PSOE e BNG non din aos veciños que no pleno do 24 de outubro de 2022 do Parlamento galego cotaron en contra da Lei de medidas extraordinarias para postos sanitarios de difícil cobertura”.

Os populares aseguran que segundo esta normativa, o procedemento permite a contratación por concurso de méritos ­– sen oposición – para o persoal médico dos centros de saúde e hospitais comarcais que teñen dificultades para cubrir prazas vacantes pola ausencia ou insuficiencia de aspirantes na listas de contratación.

“Somos conscientes das dificultades de persoal que hai no centro de saúde e no hospital, pero tamén sabemos que dende a Xunta estase a traballar para cubrir o antes posible as baixas, así como as vacantes (son dúas no centro de saúde das que unha xa saíu a concurso e cubrirase en xaneiro e a outra sairá este ano). Ademais, poñer en valor e agradecer o esforzo que está a realizar todo o persoal que está traballando para atender a toda a veciñanza de Monforte que o precisa”, explicou.

Katy Varela recorda tamén que tanto PSOE como BNG no Concello de Monforte votaron en contra, o ano pasado en pleno, dunha iniciativa do PP para reclamar a posta en marcha medidas que axudasen a paliar a falta de persoal sanitario e facilitar a cobertura das prazas vacantes e das baixas.