O Concello de Sober, na súa aposta por dixitalizar a veciñanza, asinou un convenio cunha empresa para o desenvolvemento do programa ‘Ineco Rural TIC’.
O devandito programa, que se desenvoverá do 19 de febreiro ao 1 de marzo, ten como obxectivo aproveitar o potencial das novas tecnoloxías para contribuír a visibilizar e dinamizar o medio rural. Nese senso, as accións formativas buscan impulsar, por unha banda, a dixitalización social fomentando o uso das novas tecnoloxías na poboación, en especial aquela con máis idade; e por outra banda darlle pulo á dixitalización económica, neste caso asesorando e facilitando recursos dixitais ao tecido empresarial.
ACCIÓNS FORMATIVAS
Para o desenvolvemento do programa, Ineco desprazará profesionais da compañía ao municipio soberino do 19 de febreiro ao 1 de marzo, técnicos que achegarán e compartirán coa veciñanza de Sober o coñecemento que posúen en materia de dixitalización.
Na parte que lle toca, o Goberno local comprométese a facilitar acceso á rede wifi con cobertura mínima de 4G, a poñer a disposición de Ineco os espazos necesarios para o desenvolvemento das formacións, e tamén se ocupará da estancia dos profesionais asumindo o seu custo íntegro.
A formación dixital será de gran utilidade para o persoal municipal, o CEIP Plurilingüe Virxe do Carme, a Escola de Hostalería, as asociacións, a Escola Municipal de Música, e para todos aqueles veciños e veciñas interesados en ampliar as súas competencias dixitais.
TEMAS A TRATAR NOS TALLERES
No que respecta aos Talleres Sociais, dirixidos en especial a persoas maiores, colectivos sociais e persoas vulnerables, a formación tocará temas de utilidade no día a día. En diferentes sesións tratarase a comunicación dixital (correo electrónico, mensaxería, etc), a seguridade e privacidade na internet, as transaccións económicas (banca dixital, compra online…), os trámites administrativos coa administración, asuntos relacionados coa saúde (citas médicas, recordatorio de medicamentos, localizacións familiares, xogos de memoria, etc), o uso de internet para lecer (viaxes, tempo libre, redes sociais…), ou a vixilancia e control parental.
Na planificación para os Talleres Económicos –dirixidos a autónomos, comercios ou empresas–, trataranse, entre outros temas: programas de formación en novas tecnoloxías, o posicionamento dixital, ferramentas para a organización interna, a tramitación electrónica con certificado dixital e as plataformas de contratación.
