Desde C@urel Vivo volven a denunciar “a indiferencia do SERGAS e as autoridades competentes” para garantir unha Atención Sanitaria digna e de calidade para os pacientes da montaña.

Insisten nas particulares características da comarca cunha poboación moi dispersa e envellecida e cunha orografía singular. “Calquera que coñeza esta zona sabe que resulta imposible asumir os tempos de referencia que o propio SERGAS e o 061 consideran aceptables para a atención sanitaria nunha emerxencia ou urxencia médica (máximo 30 minutos) estando un único médico para todo O Courel”.

A isto engaden que á ambulancia de apoio na zona, “o propio 061 considéraa vehículo non asistencial, é dicir, non apto para o traslado de pacientes nin do equipo sanitario. Algo que xa vimos reclamando hai tempo desde esta formación cunha proposta para cambiar de ambulancia no pleno do Concello de data 1/xullo/2022,e que foi aprobada por unanimidade e que a día de hoxe segue a ser a mesma”.